April 12, 2009

                                                       

Yexus Khetos Tub Sawv Huv Qhovtuag Rovlug Lawm (Matthew 28:6)

Nyob huv lub nplajteb nuav, yog yuav thaam txug kevntseeg mas muaj ntau paab ntau pawg, hab muaj ntau txuj kevntseeg. Cov thawjcoj kws tau rhawv lossis tsim muaj tej kevntseeg le has nuav los tub tuag taag lawm, tabsis tsi nov has muaj tuabneeg ua timkhawv hastas muaj tug sawv huv qhovtuag rovlug zoo ib yaam le Yexus Khetos. Thawj tug kws ua timkhawv hab hastas “Yexus tsi nyob ntawm nuav, Nwg tub sawv lawv le Nwg qha tseg lawm” yog ib tug timtswv ceebtsheej has (Mathais 28:6). Tomqaab ntawd maam muaj tuabneeg pum Yexus Khetos, tau nrug Nwg nyob uake, hab tseem tau nov Yexus tej lug qhuabqha lug txug ncua lub sijhawm kws cov ntseeg saib ntsoov Yexus rovqaab moog rua sau ntuj ceebtsheej. Lub sijhawm ntawd muaj ob tug txivneej naav ris tsho dlawb paug hastas, “Yexus tug kws Vaajtswv nyavnyuas coj moog sau ntuj lawm, Nwg yeej yuav rovlug ib yaam nkaus le mej pum Nwg moog ntaag” (Tegnum 1:10-11).

Yog le, cov ntseeg Yexus txhaj tsi ntshai hab tsi poob sab vim puab paub tseeb hastas Yexus Khetos tseem muaj txujsa nyob. Yexus yog Vaajtswv hab yog peb tug Cawmseej, yog tug kws tau tuag theej peb suavdlawg lub txhoj sau tug ntoo khaublig kuas txhua tug kws ntseeg Nwg dlim ntawm txujkev ua dlaab tauj dlaab qhev, dlim ntawm txuj kevtxhum, hab dlim ntawm Vaajtswv lub rooj txavtxim zag kawg.

Nub “Easter” yog muaj lug txhawb txhua tug ntseeg Yexus kuas tsi xob qaugzug. Yog leejtwg ntseeg, tug ntawd muaj kev ca sab, rua qhov Vaajlugkub hastas “Qhov kws Vaajtswv muab Yexus rua tuabneeg nplajteb coj moog tua tub yog Vaajtswv paab kuas peb dlim peb lub txim hab qhov kws Vaajtswv tsaa Yexus sawv huv qhovtuag rovlug, tub yog Vaajtswv coj peb lug nrug Vaajtswv sisraug zoo” (Romans 4:25).

Yog koj tub yog ib tug ntseeg Yexus lawm, tsi xob tso koj txuj kevntseeg tseg, rua qhov Yexus Khetos tseem muaj txujsa nyob. Yog koj tseem tsi tau txais yuav Yexus Khetos ua koj Tswv Cawmseej, thov caw koj lug ntseeg hab txais yuav Tswv Yexus nubnua. Koj txhaj dlim koj lub txim lug ntawm Vaajtswv.  Thov Vaajtswv Foom Koobmoov rua mej suavdlawg kuas nojqaab nyobzoo. . . .