Sunday May 10, 2009

                                                       

Leej Nam Nub.

Leej nam nub “Mother's Day” yog ib nub kws lub tebchaws Amelikas nuav tau teem tseg ua nub ncu txug leej nam tej txaj ntsig. Leejtwg yog tug tawm lub nam tswvyim kuas muaj ib nub lug ua Nam Nub “Mother’s Day”? Lub nam tswvyim nuav yog lug ntawm ib tug quaspuj kws muaj npe hu ua “Anna M. Jarvis.”

Nwg yog tug nquahu kuas cov tub hab cov ntxhais sis koomteg txhawb nqaa hab qhuas leej nam txug puab txuj kevkhwv kuas puab cov mivnyuas lossis tsev tuabneeg muaj noj muaj haus. Yog le ntawd, cov tub ntxhais txhaj sis koomteg muab ib nub lug ua nub kws cov mivnyuas qhuas leej nam, thawj zag yog muaj nyob rua huv lub nroog “Grafton, West Virginia” hab lub nroog “Philadelphia” kws yog nubtim 10 lub 5 hlis, xyoo 1908.

Lug rua xyoo 1914 “President Woodrow Wilson” txhaj pumzoo kuas txhua txhua xyoo twg suavdlawg yuavtsum muab lub limtam 2 ntawm lub 5 hlis ntuj ua Nam Nub “Mother’s Day.” Muaj ntau lub tebchaws tau txais yuav Nam Nub moog siv rua huv puab lub tebchaws, vim puab pum hastas yog ib qhov zoo kws suavdlawg xaam txug leej nam txuj kevhlub kws puab tau ua ntau yaam dlejnum paab cov mivnyuas.

Vaajtswv Txujlug los tub xub qha txug zaaj nuav uantej rua cov Yixalayees hastas, “Yuavtsum fwm mej nam mej txiv lawv le Vaajtswv tau qha tseg kuas mej ua, mej txhaj muajsa nrug luag ua neej nyob ntev huv lub tebchaws kws kuv muab pub rua mej nyob" (Tsiv Dlim 20:12; 2 Kevcai 5:16). Tabsis Vaajlugkub Tshab huv Efexaus 6:2-3 tau qha cov ntseeg hastas, “Mej yuavtsum fwm mej nam mej txiv.” Nqai nuav yog thawj nqai kws Vaajtswv coglug hastas, “Yog mej ua le ntawd, mej yuav nojqaab nyobzoo hab muaj txujsa nyob ntev huv nplajteb nuav.”

Qhov kws cov mivnyuas yuavtsum txawj qhuas leej nam vim leej nam yog tug qha kuas cov mivnyuas txawj ua lub neej zoo (Prov. 22:6). Tsi taag le, kev qhuas leej nam yog ib teg dlejnum kws cov mivnyuas ua hum Vaajtswv sab (Kaulauxais 3:20) hab ua lawv le Vaajtswv txuj kevcai (Tsiv Dlim 20:12; Efexaus 6:1). Yog le, Tswv Yexus txhaj qha tas, "Koj yuavtsum fwm koj nam koj txiv. Yog leejtwg tshev nwg nam nwg txiv, yuavtsum muab tug ntawd tua povtseg" (Mathais 15:4) rua qhov leej nam yog tug tu hab hlub cov mivnyuas.

Thov Vaajtswv Yexus paab kuas peb txawj hlub peb nam lawv le Vaajtswv Txujlug qha.